जनकपुरधाम – हिन्दूहरूको आस्थाको केन्द्र मानिने जानकी मन्दिरमा पुनः चोरीका घटना बढ्न थालेका छन्। बुधवार मन्दिरको गर्भगृह नजिकै दर्शन गर्न आएका श्रद्धालु महिलाहरूको सुनका गरगहना चोरी हुँदा श्रद्धालुहरूमा त्रास उत्पन्न भएको छ।

मन्दिर परिसरमा भएको अत्यधिक भीडभाडका कारण सुरक्षा व्यवस्था खल्बलिँदा आधा दर्जन महिलाको सुनका औंठी, सिक्रीजस्ता गरगहना चोरी भएको थियो। भारतबाट आएका तीर्थयात्रीको घाँटीबाट दुई जनाको सुनको सिक्री स्नेचिङ (लुटपाट) भएको खबर आएको छ।

मन्दिरमा आरती पूजा भइरहँदा चोरीका घटना भएको र यसले मन्दिरमा सुरक्षा व्यवस्थाबारे प्रश्न उठाएको छ। मन्दिर परिसरमा केही समयअघि सिसिटिभी क्यामेरा र फलामे बार्केट जडान गरिए पनि पछिल्लो घटना देखाउँछ कि सुरक्षा अझै प्रभावकारी बनाउन आवश्यक छ।

धनुषाका प्रहरी उपरीक्षक भुवनेश्वर तिवारीले चोरी गर्ने समूहलाई चाँडै पक्राउ गरी चोरिएको गहना फिर्ता गर्ने प्रतिबद्धता जनाएका छन्। थप अनुसन्धान अघि बढिसकेको बताउँदै प्रहरीले मन्दिरमा नियमित सुरक्षा व्यवस्था सुदृढ गर्ने योजना बनाएको छ।

• Jigyasa media