काठमाडौँ/नेपालका ख्यातिप्राप्त इतिहासकार पुरुषोत्तम शमशेर राणाको ९९ वर्षको उमेरमा निधन भएको छ। ललितपुरको मेडिसिटी अस्पतालमा उपचारका क्रममा उनको निधन भएको उनकी बुहारी भगवती राणाले पुष्टि गरिन्।

रक्तचाप समस्या कारण अस्पताल भर्ना भएका थिए !

राणालाई रक्तचाप कम भएपछि अस्पताल भर्ना गरिएको थियो। स्वास्थ्य अवस्था जटिल बन्दै गएपछि उनको निधन भएको हो।

जीवन र शिक्षा

विसं १९८२ चैत १५ गते चारबुर्जा दरबार (हालको निर्वाचन आयोगको भवन) मा जन्मिएका राणा जहानिया शासनकालका प्रतिबन्धका कारण पाल्पा दरबारमै अध्ययन गर्न बाध्य भए। युपी बोर्डबाट एसएलसी उत्तीर्ण गरेका उनले भारतको वाराणसीस्थित जयनारायण कलेजबाट इन्टर–मिडियट पूरा गरे। बनारस हिन्दू विश्वविद्यालयमा विकम अध्ययनकै क्रममा उनी क्रान्तिमा सक्रिय भएका थिए।

साहित्यिक योगदान

इतिहास र संस्कृतिमा गहिरो रुचि राख्ने राणाले थुप्रै महत्त्वपूर्ण कृतिहरू लेखेका छन्। उनका चर्चित कृतिहरूमा:

श्री ३ राणाकालीन प्रमुख ऐतिहासिक दरबारहरू

लुकेछिपेका प्रतिभाहरू

मेरा जीवनका स्मृतिहरू

उनका कृतिहरू राणाकालीन दरबार संस्कृति र नेपालको ऐतिहासिक अध्ययनका लागि अमूल्य स्रोत मानिन्छन्।

पुरुषोत्तम शमशेर राणा रुद्र शमशेरका नाति र ईश्वर शमशेरका छोरा हुन्। उनको जीवन र योगदानले नेपाली इतिहासको अध्ययनलाई समृद्ध तुल्याएको छ।

नेपाली समाजमा गहिरो प्रभाव

इतिहासकार राणाको निधनले नेपाली साहित्य र इतिहास क्षेत्रमा ठूलो क्षति पुगेको छ। उनको स्मरणीय योगदानले लामो समयसम्म समाजमा प्रेरणा प्रदान गर्नेछ।

नेपालले एक महान् इतिहासकारलाई गुमाएको यो क्षणमा उनका योगदानहरूको सम्मान गर्न उनका कृतिहरूलाई अझ

सुरक्षित गर्नु उपयुक्त हुने बताइन्छ ।

• Jigyasa media