काठमाडौं । सरकारले नेपालमा सामाजिक सञ्जाल टिकटकमाथिको प्रतिबन्ध हटाएको छ। सबै मोबाइल र इन्टरनेट सेवा प्रदायक कम्पनीहरूलाई टिकटकको सेवा पुनः सुरु गर्न निर्देशन दिइएको छ।

नेपाल दूरसञ्चार प्राधिकरणले शुक्रबार जारी गरेको सूचनामा मन्त्रिपरिषदको निर्णयअनुसार टिकटकमाथिको प्रतिबन्ध हटाउन निर्देशन दिइएको हो। 

प्रतिबन्ध हटाउन सरकारले टिकटकका प्रतिनिधिहरूसँग शर्त राखेको थियो, जसका लागि टिकटकका प्रतिनिधिहरू सिंगापुरबाट काठमाडौं आएका थिए। बुधबार सञ्चार तथा सूचना प्रविधि मन्त्रालयमा भएको छलफलमा टिकटकले सरकारका सबै शर्तहरू स्वीकार गर्ने प्रतिवद्धता जनाएपछि प्रतिबन्ध हटाउने प्रक्रिया अघि बढाइएको थियो। 

सरकारले टिकटकले सामाजिक सद्भाव खलबल्याएको भन्दै २७ कात्तिक २०८० मा प्रतिबन्ध लगाएको थियो। करिब साढे नौ महिनापछि, गत ६ भदौमा मन्त्रिपरिषदको बैठकले शर्तसहित टिकटकमाथिको प्रतिबन्ध हटाउने निर्णय गरेको थियो।

अब टिकटकले सरकारले निर्धारण गरेका शर्तहरूको पालना गर्दै पुनः सञ्चालनमा आउनेछ, जसले सामाजिक जिम्मेवारीलाई ध्यानमा राखेर सञ्जालको सही प्रयोगलाई प्रोत्साहन गर्ने अपेक्षा गरिएको छ।

• Jigyasa media