काठमाडौं । देशका अधिकांश भूभागमा आज मौसम बदली रहने मौसम पूर्वानुमान महाशाखाले जनाएको छ। विशेषगरी पाँच प्रदेशका विभिन्न क्षेत्रमा मेघगर्जन र चट्याङसहित भारी वर्षाको सम्भावना रहेकाले सतर्कता अपनाउन आग्रह गरिएको छ।

दिउँसो कोशी, बागमती र गण्डकी प्रदेशका हिमाली तथा पहाडी क्षेत्र, कर्णालीको पहाडी भूभाग तथा लुम्बिनी र सुदूरपश्चिमका पहाडी तथा तराई क्षेत्रका एक–दुई स्थानमा भारी वर्षा हुनसक्ने पूर्वानुमान छ।

त्यसैगरी, लुम्बिनी र सुदूरपश्चिमका तराई क्षेत्रमा धेरै स्थान तथा कोशी, बागमती र गण्डकीका तराई भूभागका केही स्थानमा मेघगर्जन र चट्याङसहित मध्यम वर्षाको सम्भावना रहेको छ। मधेशका केही स्थानमा पनि वर्षा हुनसक्ने जनाइएको छ।

रातिको समयमा पनि देशभर सामान्यतया बादल लाग्नेछ। कोशी, बागमती र गण्डकीका पहाडी क्षेत्रमा धेरै स्थान तथा लुम्बिनी, कर्णाली र सुदूरपश्चिमका पहाडी क्षेत्रमा केही स्थानमा मेघगर्जनसहित मध्यम वर्षा हुनसक्नेछ।

राति कोशी, बागमती र गण्डकीका पहाडी भूभाग तथा कोशी, लुम्बिनी र सुदूरपश्चिमका तराई क्षेत्रमा एक–दुई स्थानमा भारी वर्षा हुनसक्ने महाशाखाले जनाएको छ।

महाशाखाले वर्षा, चट्याङ र हिमपातको सम्भावना भएका क्षेत्रमा आवश्यक सावधानी अपनाउन तथा यात्रा गर्दा मौसमको अवस्था बुझेर मात्रै अघि बढ्न आग्रह गरेको छ।

• Jigyasanepal