काठमाडौं, पुस २७ – त्रिभुवन अन्तर्राष्ट्रिय विमानस्थलबाट सुनजस्तो देखिने धातुसहित तीनजना पक्राउ परेका छन्। पक्राउ पर्नेहरूमा सप्तरीका ३२ वर्षीय कृष्णप्रसाद चौधरी, ३० वर्षीय मोहम्मद इलियास, र सुनसरीका २७ वर्षीय शिवशंकर चौधरी रहेका छन्।
प्रहरीका अनुसार उनीहरू हिमालय एयरलाइन्सको उडानमार्फत कतारको दोहाबाट काठमाडौं आएका थिए। भन्सार छली ल्याउन खोजिएको धातुसहित शुक्रबार जाँचका क्रममा उनीहरू पक्राउ परेका हुन्।
त्रिभुवन विमानस्थलको आगमन टनेल गेटमा जाँच गर्दा कृष्णप्रसादको साथबाट ५८.३३ ग्रामको सुनजस्तो देखिने सिक्री, मोहम्मद र शिवशंकरको साथबाट पनि समान परिमाणको सिक्री बरामद भएको प्रहरीले जनाएको छ।
उनीहरूले मलद्वारमा लुकाएर ल्याएको धातु निकालेर आवश्यक अनुसन्धानका लागि त्रिभुवन विमानस्थल भन्सार कार्यालयमा बुझाइएको छ।
अहिलेसम्म यो सुनजस्तो देखिने धातु वास्तविक सुन हो वा होइन भन्ने विषयमा परीक्षण भइरहेको छ। प्रहरीले यस घटनालाई भन्सार छलीको गम्भीर मुद्दा मानेर अनुसन्धान गरिरहेको छ।
- Jigyasa media
