मकवानपुर ।मकवानपुरको इन्द्रसरोवर गाउँपालिका–३ अदुवाबारीमा घरमा चोरी भएको आशंकामा प्रतिकार गर्ने क्रममा एक व्यक्तिको मृत्यु भएको छ।

जिल्ला प्रहरी कार्यालय मकवानपुरका अनुसार मृत्यु हुने व्यक्ति ३० वर्षीय भरथकुमार भ्लोन हुन्। बिहीबार राति ९ बजेतिर उनी आफ्नो घर पुगेका थिए, जहाँ उनका ६४ वर्षीय बाबु मीनबहादुर भ्लोन र ६३ वर्षीया आमा देवीमाया भ्लोन थिए।

घटनाका क्रममा मुखमा मास्क लगाएर आएका व्यक्तिले मीनबहादुर र देवीमायाको आँखामा खुर्सानीको धुलो हालेपछि उनीहरूले चोर भएको आशंकामा प्रतिकार गरेका थिए। प्रतिकारको क्रममा भरथकुमार गम्भीर घाइते भए। उपचारका लागि चितवन लगिएको भए पनि उनको ज्यान जोगाउन नसकिएको प्रहरीले जनाएको छ।

भरथकुमार चार वर्षदेखि घर नफर्किएको र अन्धकारमा समेत बाबुआमाले उनलाई चिन्न नसकेको हुन सक्ने अनुमान गरिएको छ।

यस घटनामा बाबुआमा स्वयं पनि गम्भीर घाइते भएका छन्। बाबुको करङ र हातको औंला भाँचिएको छ भने आमाको हातमा चोट लागेको छ। उपचारका लागि उनीहरूलाई काठमाडौं ल्याइएको छ। हाल घटनाबारे अनुसन्धान भइरहेको प्रहरीलेजनाएको छ।

• Jigyasa media