Breaking News
प्रधानमन्त्री बालेन शाह भारतको दुईदिने राजकीय भ्रमणमा जाँदै, आज नयाँ दिल्ली प्रस्थान गर्ने    ||     सुदूरपश्चिमको ऐतिहासिक छलाङ : लुम्बिनीलाई १० विकेटले हराउँदै पहिलोपटक एनपीएल च्याम्पियन    ||     एनपीएल उपाधिका लागि लुम्बिनी र सुदूरपश्चिम भिड्दै, कसले उचाल्ला ट्रफी ?    ||     आज देशभरको मौसम मुख्यतया सफा रहने, वर्षा र हिमपातको सम्भावना न्यून    ||     तुलसी–दामोदरको विवाह गराउँदै आज देशभर हरिबोधिनी एकादशी मनाइँदै    ||     ‘अक्वान’ चक्रवात र पश्चिमी वायुको आंशिक प्रभाव, तराईमा हुस्सु र तुवाँलो    ||     पश्चिमी वायुको प्रभाव कायमै, हिमाली क्षेत्रमा वर्षा र हिमपातको सम्भावना    ||     पश्चिमी वायुको आंशिक प्रभाव, तराईमा तुवाँलो र बिहान हुस्सु लाग्ने    ||     उदाउँदो सूर्यलाई अर्घ्य दिँदै छठ पर्व सम्पन्न    ||     कोशी, बागमती र गण्डकीका हिमाली क्षेत्रमा हल्का वर्षा तथा हिमपातको सम्भावना    ||    

उदाउँदो सूर्यलाई अर्घ्य दिँदै छठ पर्व सम्पन्न

  •   ७ दिन अघि | ३० कार्तिक २०८३, सोमवार

महोत्तरी । उदाउँदो सूर्यदेवलाई अर्घ्य अर्पण गर्दै यस वर्षको छठ पर्व सोमबार बिहान सम्पन्न भएको छ । तराई–मधेससहित देशका विभिन्न स्थानमा श्रद्धा, भक्ति र उल्लासका साथ मनाइएको छठ पर्वको अन्तिम विधि सप्तमी तिथिका दिन बिहान उदाउँदो सूर्यलाई अर्घ्य दिएसँगै पूरा भएको हो ।

गत शनिबार पञ्चमी तिथिका दिन मध्यरातअघि देखि निराहार व्रत सुरु गरेका व्रतालुले सोमबार बिहान सूर्य उदाएसँगै सूर्यदेवलाई अर्घ्य अर्पण गरेका हुन् । यसअघि आइतबार साँझ षष्ठी तिथिका दिन अस्ताउँदो सूर्यलाई पहिलो अर्घ्य दिइएको थियो ।

सूर्य उपासनाको महापर्व सम्पन्न भएसँगै व्रतालुहरू छठी घाटबाट घर फर्किएका छन् । पर्वका क्रममा व्रतालुले दीनदुःखी तथा आशामुखीहरूलाई अन्न र वस्त्र दान गरी प्रसाद ग्रहण गर्ने परम्परा छ । यससँगै छठको प्रसाद खाने र खुवाउने क्रम पनि सुरु भएको छ ।

छठ पर्व कात्तिक शुक्ल चतुर्थीदेखि सप्तमीसम्म चार दिन विभिन्न धार्मिक विधि र परम्पराअनुसार मनाइन्छ । चतुर्थीका दिन पवित्र स्नान गरी चोखोनितो खाएर व्रतको सङ्कल्प गर्ने विधिलाई ‘नहाय–खाय’ भनिन्छ । पञ्चमीका दिन राति एक छाक मात्र नुन नहालेको खाना खाएर गरिने विधिलाई ‘खरना’ भनिन्छ ।

त्यसैगरी षष्ठी तिथिको साँझ अस्ताउँदो सूर्यलाई अर्घ्य दिने विधिलाई मिथिलामा ‘सझियाघाट’ वा ‘सझुका अरख’ भनिन्छ । सप्तमीका दिन बिहान उदाउँदो सूर्यलाई अर्घ्य दिएर पर्व सम्पन्न गर्ने विधिलाई ‘भोरका अरख’ वा ‘पारन’ भन्ने गरिन्छ ।

छठ पर्वमा ठकुवा, भुसुवा, केरा, विभिन्न फलफूल तथा माटोका भाँडामा जमाइएको दहीलगायत परिकार सूर्यदेवलाई चढाइन्छ । पूजामा चढाइएका यी सामग्रीलाई प्रसादका रूपमा ग्रहण गर्ने र आफन्त तथा इष्टमित्रलाई बाँड्ने परम्परा छ ।

मिथिलामा छठको प्रसाद खाने र खुवाउने क्रम महिनौँसम्म चल्ने गर्छ । विशेषगरी छोरीचेली, फुपू, मित तथा अन्य इष्टमित्रका घरमा छठको प्रसाद ‘भार’ अर्थात् सोलीमा राखेर पठाउने मैथिल परम्परा रहिआएको छ ।

सूर्यदेवको उपासना गर्दा सुख, शान्ति, सन्तोष प्राप्त हुने तथा रोगव्याधिबाट मुक्ति मिल्ने धार्मिक विश्वासका साथ छठ पर्व मनाइन्छ । प्रकृति, सूर्य र जलप्रतिको आस्था तथा पारिवारिक सुखसमृद्धिको कामनासँग जोडिएको यस पर्वले सामाजिक सद्भाव र सांस्कृतिक एकतालाई समेत बलियो बनाउँदै आएको छ ।

राष्ट्रिय समाचार समिति (रासस)को सहयोगमा।

  • Jigyasanepal

थप