नवलपुर, साउन २५ ।
गैंडाकोट र भैसाखोरी बीचको जंगलमा आइतबार साँझ भएको भीषण सडक दुर्घटनामा दुई जनाले ज्यान गुमाएका छन्। ना ५ ख ८४१७ नम्बरको ट्रक र लु ५५ प ३१३४ नम्बरको स्कुटर आपसमा ठोक्किँदा स्कुटरमा सवार दुवैजनाको घटनास्थलमै मृत्यु भएको जिल्ला प्रहरी कार्यालय नवलपुरले पुष्टि गरेको छ।
दुर्घटनापछि ट्रकको अगाडिको भागमुनि च्यापिएका दुवैजनालाई प्रहरी र स्थानीयले उद्धारको प्रयास गरेका थिए। प्रहरीका सूचना अधिकारी मधु नेपालका अनुसार, मृतकको पहिचान अझै खुल्न सकेको छैन र घटनास्थलमै प्रारम्भिक अनुसन्धान भइरहेको छ।
“दुवैजनालाई ट्रकमुनि च्यापिएको अवस्थामा भेट्यौं, अहिले उद्धार र ट्रक हटाउने काम भइरहेको छ,” उनले भने।
दुर्घटनाको थप विवरण, कारण र स्कुटर चालकको परिचय खुल्नेबित्तिकै सार्वजनिक गरिने प्रहरीले जनाएको छ।
यस घटनाले फेरि एकपटक पूर्व–पश्चिम राजमार्गमा बढ्दो सडक दुर्घटनाप्रति चिन्ता बढाएको छ। स्थानीयवासीले यस खण्डमा गति नियन्त्रण, सडक सुरक्षासम्बन्धी कडाइ र प्रहरीको निगरानी बढाउन माग गरेका छन्।
-
Jigyasanepal
