हेटौँडा, चैत २० — माध्यमिक शिक्षा परीक्षा (एसईई) लाई निष्पक्ष र मर्यादित बनाउने प्रयासकै बीच मकवानपुरको हेटौँडामा गम्भीर अनियमितता उजागर भएको छ। परीक्षा केन्द्रमै अर्काको नाममा परीक्षा दिन पुगेका एक नक्कली परीक्षार्थीलाई प्रहरीले पक्राउ गरेको छ।
हेटौँडा उपमहानगरपालिका–१० भुटनदेवीस्थित सोलिड्यारेटी माध्यमिक विद्यालय मा सञ्चालित एसईई परीक्षा केन्द्रबाट उक्त घटनाको पर्दाफास भएको हो।
प्रहरीका अनुसार सिन्धुलीको मरिन गाउँपालिका–४ घर भई हाल हेटौँडामा बस्दै आएका १८ वर्षीय बिराज विक अर्काको नाममा परीक्षा दिन आएको अवस्थामा नियन्त्रणमा लिइएको हो। उनी हेटौंडा स्कुल अफ म्यानेजमेन्ट मा कक्षा ११ मा अध्ययनरत रहेका छन्।
प्रवेशपत्रमा फोटो फेरेर परीक्षा दिन पुगे
प्रारम्भिक अनुसन्धानमा बिराजले हेटौँडा उपमहानगरपालिका–१२ पदमपोखरी निवासी १९ वर्षीय अंकिश श्रेष्ठको नाममा जारी गरिएको प्रवेशपत्रमा आफ्नो फोटो टाँसी परीक्षा दिन आएको खुल्न आएको छ।
जिल्ला प्रहरी कार्यालय मकवानपुर का प्रहरी नायब उपरीक्षक पुष्कर बोगटीका अनुसार दुवै जनालाई नियन्त्रणमा लिएर थप अनुसन्धान अघि बढाइएको छ।
शिक्षा प्रणालीमाथि गम्भीर प्रश्न
एसईई जस्तो राष्ट्रियस्तरको परीक्षामा यस प्रकारको नक्कली परीक्षार्थी प्रकरण सार्वजनिक हुनु शिक्षा प्रणालीको विश्वसनीयतामाथि गम्भीर प्रश्न खडा गर्ने विषय बनेको छ।
परीक्षा व्यवस्थापनलाई कडाइका साथ लागू गरिए पनि अझै पनि यस्ता घटना दोहोरिनु चुनौतीपूर्ण रहेको सरोकारवालाहरू बताउँछन्।
प्रहरीले घटनामा संलग्न दुवै व्यक्तिमाथि आवश्यक कानुनी प्रक्रिया अघि बढाउने जनाएको छ।
-
Jigyasanepal
