काठमाडौँ, चैत १९ — गत फागुन २१ मा सम्पन्न प्रतिनिधिसभा निर्वाचनपछि नयाँ राजनीतिक अध्याय सुरु गर्दै आजदेखि सङ्घीय संसद्को अधिवेशन औपचारिक रूपमा प्रारम्भ हुँदैछ। नवनिर्वाचित प्रतिनिधिसभा को पहिलो बैठक आज दिउँसो २ बजे सिंहदरबार स्थित निर्माणाधीन सङ्घीय संसद् भवनको बहुद्देश्यीय कक्षमा बस्नेछ।
रामचन्द्र पौडेल ले यही चैत १६ गते मन्त्रिपरिषद्को सिफारिसमा संविधानबमोजिम सङ्घीय संसद्को दुवै सदनको अधिवेशन आह्वान गरेका थिए। संवैधानिक व्यवस्थाअनुसार निर्वाचन परिणाम सार्वजनिक भएको ३० दिनभित्र संसद् अधिवेशन बोलाउनुपर्ने प्रावधान रहेको छ।
संसद् सचिवालयका प्रवक्ता एकराम गिरीका अनुसार बैठक सञ्चालनका लागि भौतिक, सुरक्षा, प्राविधिक तथा जनशक्ति व्यवस्थापनका सबै तयारी पूरा भइसकेका छन्। यता माथिल्लो सदन राष्ट्रियसभा को बैठक भने संसद् सचिवालयस्थित राष्ट्रियसभा कक्षमै बस्नेछ।
यस्तो छ संसद्को अंकगणित
दुई सय ७५ सदस्यीय प्रतिनिधिसभामा यसपटक राष्ट्रिय स्वतन्त्र पार्टी सबैभन्दा ठूलो दलका रूपमा १८२ सिटसहित उपस्थित छ। त्यसपछि नेपाली कांग्रेस का ३८, नेपाल कम्युनिष्ट पार्टी (एमाले) का २५, नेपाल कम्युनिष्ट पार्टी का १७, श्रम संस्कृति पार्टी का ७, राष्ट्रिय प्रजातन्त्र पार्टी का ५ र एक स्वतन्त्र सांसद रहेका छन्।
पहिलो बैठकमै तीन अध्यादेश
आजको बैठकमा सुधन गुरुङ ले तीन महत्त्वपूर्ण अध्यादेश पेस गर्ने कार्यसूची तय भएको छ। तीमध्ये ‘मतदाता नामावली (पहिलो संशोधन) अध्यादेश २०८२’, ‘प्रतिनिधिसभा सदस्य निर्वाचन (पहिलो संशोधन) अध्यादेश २०८२’ र ‘नेपाल विशेष सेवा (दोस्रो संशोधन) अध्यादेश २०८२’ रहेका छन्।
बैठकको प्रारम्भमा ज्येष्ठ सदस्य/सभामुख अर्जुननरसिंह केसी ले राष्ट्रपतिबाट प्राप्त अधिवेशन आह्वानसम्बन्धी पत्र तथा प्रधानमन्त्री नियुक्ति र मन्त्रिपरिषद् गठनसम्बन्धी विवरण पढेर सुनाउनेछन्।
नियमावली र बैठक सञ्चालन
संसद्ले आफ्नो नयाँ नियमावली पारित नगरेसम्मका लागि प्रतिनिधिसभा नियमावली २०७९ बमोजिम बैठक सञ्चालन गर्ने प्रस्ताव प्रस्तुत गरिनेछ। साथै, सभामुख अनुपस्थित हुँदा बैठक सञ्चालन गर्ने सदस्यहरूको मनोनयनसम्बन्धी प्रक्रिया पनि आजकै बैठकमा अघि बढ्नेछ।
निर्वाचनपछिको पहिलो बैठकसँगै अब देशको राजनीतिक दिशा, सरकारको कार्यशैली र कानुनी एजेन्डाहरू संसद्को केन्द्रमा प्रवेश गर्नेछन्। नयाँ जनादेशलाई कसरी कार्यान्वयन गरिन्छ भन्ने चासोका बीच सुरु हुन लागेको यो अधिवेशनलाई अर्थपूर्ण र निर्णायक मानिएको छ।
-
Jigyasanepal
